مودة ورحمة وكفى !!!

يعني إيه جواز!! إحنا ليه بنتجوز!! طب بنختار أزواجنا على أساس إيه!!

أسئلة تبدو في فظاهرها سطحية وساذجة .. لكن فحقيقة الأمر لو تأملناها وفكرنا فيها وسألنا 2 أو 3 حولينا نفس السؤال هتلاقي الإجابة اختلفت عليهم!! لأن كل واحد بيبص للزواج من منظوره الشخصي وبموجب احتياجاته!! وكذلك بالنسبة لشريك حياته!!

ناس شايفة الزواج مجرد سبق!! يعني وصلت لسن كام!! كل ده ولسه متجوزتش!! البنت بنقول عليها "عنست" ولو حلوة وكويسة بزيادة "هما الرجالة اتعموا" وكأن هي مسلوبة الإرادة!! وانت يا إبني سايب نفسك كل ده ليه!! أكيد مقضيها!! أو يمكن خايف يتجوز من كتر عمايله السودا!! وأي منهم لازم يسمع الكلمتين المعتادين "لازم تلحق القطر وتتجوز أو تتجوزي عشان تلحقوا تجيبوا حتة عيل تتسندوا عليه فالدنيا" !!

وناس شايفة الزواج مجرد علاقة جنسية فطرية فسيولوجية بيولوجية ينتج عنها أطفال!!! يعني شوية رغبات مكبوتة وبيتم تلبيتها وفقًا للاحتياجات أو "لواجب الشرعي" عن طريق العلاقة الزوجية الحميمة"!!

وناس غيرهم بيعتبروه شركة بين طرفين !! وضمانه ورقة بيسموها "القايمة" !! فيها كل واحد دفع إيه واشترى إيه!! وطبعًا كل شيء بالاتفاق!! وياما جوازات بتبوظ بسبب الورقة دي!!

وناس تانية بأه!! الجواز عندهم "ابن الناس" أو "بنت الناس الكويسين"!! بنت فلان !! قريب علان!! وإللي معاه عربية أخر موديل!! وهيجيبلها فيلا أحلى من بتاعة بابي!! ويمكن كمان تقضي شهر العسل فباريس!!

ده غير طبعًا بتوع إحنا معندناش حد بيتجوز من بره العيله!! عشان أطيان العيله متروحش لحد غريب!! ولازم الواد يتجوز بنت عمه!! وبيخطبوهم لبعض من وهما فاللفه !!

وغيرهم وغيرهم...........كتيييييييييييييييييييير!!

مش عارفة ليه طول حياتي مقدرتش أشوف الجواز بأي من العيون دي!! اتهموني كتير إني حالمة وخيالية وبفكر بأسلوب شاذ وغريب!! يمكن لأن معايير الجواز بالنسبه لي مختلفة بعض الشيء!! مش بحلم بالواد الحلو الأمور –المز- اللي البنات هتموت عليه!! ولا ابن الناس الكويسين!! ولا اللي هيعيشني عيشه عمري ما كنت أحلم بها!! مش عارفة ليه حسيت إن كل اللي فوق رخصوا الجواز وأهانوه !! مثلًا أول مثال إللي حسسني إننا فمارثون ومين اللي يلحق يسبق!! إيه اللي يجبرني اتجوز أي جوازه والسلام لمجرد اني وصلت لسن معين!! هل أتجوز وأنا عمري 20 لمجرد اني أبقى فنظر الناس البت الفتكه اللي وقعت العريس!! طب اضمنلي ان البنت دي اختارت على أساس صح!! اضمنلي انها مؤهلة للمسئولية دي أصلا!! وليه بتقولوا ان الرجالة اتعمت لمجرد إن البنت اللي كبرت ومتجوزتش رغم مميزات كتير!! ما يمكن هي اللي مبترمرمش!! على فكرة احنا مش سلعة ففترينة!! ولاملناش رأي!! وعلى فكرة أنا عندي لو هعيش اللي باقي من عمري كأيام قليلة سعيدة!! أحسن كتير من ما أدفن حياتي فعلاقة فاشلة!!

أما بقى الاختيار التاني!! أنا مش بقدر أسميه غير "كلاب وقطط"!! عادي يعني !! ومش هدخل فتفاصيل كتير عشان ناس كتير هتزعل مني!!

وبالنسبة للتجار الحلوين !! إلا صحيح هي ملل السرير على مين!! طب النجف والستاير!! طب وبالنسبة لطقم الصيني!! هي الصفقة دي دايمًا بتنجح!! معلومة صغيرة!! الست اللي مش بطيق العيشة مع جوزها !! لو عندها كرامة هترميله كل حاجة فوشه ومش هتفكر فورقتكم!! وكذلك الراجل اللي معندوش أصل!! عادي ممكن يخرج مراته من بيته بقميص النوم اللي عليها!!

ويا بتوع ولاد الناس النضاف !! يا ما البدل بتداري سلطة وحدش داري!! ويا بتوع الأطيان يا ولاد العم!! سيبوا عيالكم يختاروا !! متجبرهومش على اختيار حياتهم يالله عليكم!!

وبما إني بطبيعتي طول عمري مشكوك فأمري!! والكل بيتهمني إني نمروده ومش بيعجبني العجب!! وإني هفضل أتنمرد على خلق الله كدة لحد لما مش هلاقي حد يبص فخلقتي!! أنا مش هوضح وجهة نظري عشان عايزاكوا تفهموني !! لا عشان يمكن تفوق ناس كتير !! يمكن أكون مبالغة أو رومانسية وحالمة زيادة عن اللازم!! بس اسمعوني وخدوني على أد عقلي!!

يالنسبة لي الجواز ده أسمى علاقة فالوجود!! مش متخيلة إني ممكن أحقره لوصفه بمجرد علاقة سريرية بين شخصين !! ولا صفقة

بين عيلتين!! أصلها مش بيعه وشروه!! ولا تلقيح حيوانات!! الجواز شركة بس مش أساسها رأس المال!! شركة أساسها اختيار شخصين لبعض بناء على حب ومشاعر صادقة!! وطبعًا قلبك وعقلك لازم يتفقوا على الشخص ده!! يعني التوافق الفكري والتفاهم أكيد عامل أساسي لنجاح الزواج!! الزواج عقد اتفاق مفيش منه راجعه!! عقد بين اتنين قرروا يكملوا حياتهم سوا!! إزاي وفين وامتى!! هما مع بعض!! هتقولولي على أرض الواقع مينفعش!! والعاهات والتقاليع!! هقولكم طظ "لمؤاخذة"!! الظروف!! طظين!! طالما شاريين بعض وباقيين على بعض يبقى طظ فأي حاجة تانية!! جوزي يعني راجل شايفاه أب مثل وقدوة لولادي!! ضهري وسندي فالدنيا وجوزي اللي عايزاه فالأخره!! راجل هحس معاه بالدفء والحنان!! هحس اني فعينه أحلى ست فالدنيا ولو بيشوف ملايين الستات كل يوم!! راجل هأمنه على نفسي!! عارفه اني يوم ما هتعب هيكون الإيد اللي تطبطب عليا وتداويني.. يوم معيط هيمسح دموعي قبل ما تنزل من عيوني!! راجل هحس وأنا فحضنه بمعنى الأمان!! بإنسانيتي وأنوثتي!! راجل بيخاف عليا!! هحس إنه أبويا وأخويا وصاحبي وجوزي وابني كمان، راجل عايزني طول عمري ناجحة مش بيغير من طموحي ولا نجاحي!! راجل همه فالدنيا يرفع مقامي عند ربنا ويساعدني أكون إمرأه صالحة !! هي دي المعايير إللي أنا بختار على أساسها جوزي!! هي دي علاقة الزواج من مفهومي الضيق والمحدود!! وهو ده الزوج إللي هدفع عمري وحياتي عشان يكون سعيد معايا!! هو ده البني أدم اللي يستحق تضحي وتتعبي وتكافحي معاه!! أه تكافحي!! بيتك لو مشفتهوش بيكبر بإيدك يوم ورا يوم!! وشقيتي وطلع عينك فيه انتي وهو سوا!! عمركوا ما هتحسوا بقيمته!! وختامًا أحب أفكركم بالأية الكريمة اللي هتلخص كل كلامي فكلمتين تدبروا معانيها !! بسم الله الرحمن الرحيم "ومن آياته أن خلق لكم من أنفسكم أزواجا لتسكنوا إليها وجعل بينكم مودة ورحمة إن في ذلك لآيات لقوم يتفكرون" صدق الله العظيم

#ارتقوا بالله عليكم

صراع الأجيــــــــــــــــــــــــــــــال!!!

يعني إيه صراع أجيال!! يعني صراع بين جيل عاش طول عمره ماشي جنب الحيط!! جيل بيخاف يتكلم ليروح ورا الشمس!! جيل مفهومه عن الطموح على أد لحافك مد رجليك!! جيل إحييني النهاردة وموتني بكره!! جيل يا عم دول عالم واصله وقرايبهم ناس مهمين اتقي شرهم!! جيل بدع مفهوم "الشاي" فالمصالح الحكومية!! جيل سكت على فساد وظلم وسرقة وقهر أكثر من 30 سنة!! جيل لسه بيقولوا عاش الملك!! جيل مصدر المعلومات بالنسبه له "جريدة الأهرام" و "القناه الأولى" ... جيل شايف إن الانترنت هو اللي بوظنا وتلف أخلاقنا !!! جيل عمره ما قال لا !!! أنا بتكلم عن جيل ما فوق الأربعين!!! جيل أهالينا مع كامل احترامي لهم!!! 

احنا مين!!! احنا شباب شال الهم بدري!! شباب أقصى طموحه فالحياه هي الحياه نفسها!!! جيل نفسه يعيش!! جيل نفسه يتعلم وبيتكر ويطور بلده!! جيل نفسه يتخرج من كليته يشتغل ويشتري شقة ويتجوز ويخلف!!! جيل نفسه ميبقاش في ظلم ولا رشوة ولا فساد!! جيل نفسه يعيش حر!!! جيل من 3 سنين قرر يثور ... ضد حاكم ظالم وفاسد!!! جيل قرر يقول كفاية قهر !!! كفاية ذل!!! كفاية جهل !!! كفاية مرض!!! جيل فعلًا مبقاش شايف مستقبل عشان يتخيل مستقبل ولاده!!!

والنتيجة!!!! أهالينا قالوا علينا خونة وعملاء ومننا لله خربنا البلد!!! أنهي بلد!!!! البلد الليالمدارس فيها 90 طالب فالفصل!!!

بلد السرطان والكبد الوبائي والفشل الكلوي!!مصر العشوائيات !!ولا مصر حوادث القطارات!!! ولا أنهي بلد!! 

فاكرين لما هتفنا "يا أهالينا انضموا لينا ... الكرامه ليكوا ولينا " ... واضح اننا غلطنا فالهتاف ده!!! احنا مكناش نعرف وقتها إن أكثر حد ضدنا هما أهالينا دول...!!! وهما كارت الرهان النهاردة اللي بيتلعب به!!!أهالينا اللي شتمونا لما كنا ضد مبارك ..... وطبلوالطنطاوي سنة ونص لحد ما خلص صفقته مع الإخوان وعملنا تعديلات دستورية....وبعدها مجلس شعب... والله طنطاوي بالبدلة الملكي ونبي شكله رئيس... لا احنا هنختار شفيق أبو بلوفر عشان شاكله كيوت والراجل بردوا شكله رئيس.... وحطونا مابين شفيق ومرسي....وكانت المأساه..... وفالأخر منكم لله جبتولنا الإخوان!!!!! وبقينا احنا السبب!!! فقرروا بعد القاعدة على الكنبة 3 سنين ينزلوا يصلحوا غلطنا ويرجعوا كل حاجة زي ما كانت !!! والجميل لما تسمع منهم أخبار تشل تقولهم جبتوا الكلام ده منين!!! تلاقي مثلا "عكاشة" "الحيزبونة لاميس" ولا "أحمد موسى" "خيري" شوية أشكال كدة من اللي تموع النفس....فإذ بك تصرخ وتقول ربي إني لا أسألك رد القضاء ولكني أسألك اللطف فيك... 

طب بجد!!! ارحمونا .... ضيعتوا مستقبلنا وشبابنا وحياتنا ....سيبونا نتخيل مستقبل لعيالنا... انتوا لما كنتوا فسننا كنتوا بتحبوا وتخرجوا وتتفسحوا ..... مش مقضيين حياتكم بين اعتقالات ودم وانفجارات ومستشفيات!!! احنا لسه فالعشرينات وعايشين على المهدئات ونصنا عنده أمراض مزمنة أقلها الضغط.....!! احنا مش متخيلين نفسنا هنوصل ل40 سنة أصلًا!!!!! انتوا ليه مصريين تعملوا فينا كدة...لما كنت بتناقش مع أمي إن أزمة المصالح الحكومية هتتحل لو مسكنا الشركات دي لشباب ... كنت بهزأ وتقولي عايزين شوية عيال تاريخ ميلادهم تاريخ تعينا يعملوا فاهمين علينا !! ولو تأملت الوضع هتلاقي إن بعد بالكثير 7 سنين الشركات دي هتفضى لأن موظفينها طلعوا معاش!!! واحنا قاعدين.....!!!!! يعني من الأخر الجيل ده حالف ليقضي علينا لحد أخر يوم فعمره عمره!!! جيل عاش طول عمره ظالمنا بسكوته .. جاي انهارده يقتلنا بصوته !!!! اهتفوا واحتفلوا وصوتوا فانتخابات وفوضوا !!!!بس متطلبوش مننا نفضل فيها!!! متلموش علينا واحنا سايبينهلكم وطفشانين!!! احنا مش وحشين بس انتوا اللي مصريين تخلونا مش عايشين!!!!

عبوكوا كلكوا !!!

عشان بس الناس إللي بتصطاد فالمياه العكره!! إللي بيحصل ده مين المسئول عنه!! لو انت واقف على اليمين "مؤيد للجيش والشرطة وبتقول على الإخوان إرهابيين" وبتقول سيسي بطل شعبي وشايفه رئيسك..!! هتشوف إن الإخوان هما السبب !! ولو واقف على الشمال ناحية بتوع الشرعية وثورة دي ولا انقلاب و C.C قاتل و C.C خاين ...وبتقول علينا انقلابين هتشوف إن التفجيرات شغل مخابرات !! وإن جماعة أنصار بيت المقدس الجناح اليمين تقريبا لأمن الدولة..!!

وأنا من موقعي هذا!! أحب أقولكم طظ فيكوا انتوا الجوز!! "لمؤاخذة يعني"... أولًا !! أه الإخوان اللي عملوها ولسه ... وباعترفاتهم !! ارجعوا كدة لتسجيلات الاعتصام!! لو مرسي مرجعش هيكون في "سيارات مفخخه وقتابل بالريموت كنترول ومش عارف إبه وهنفجر مصر... وإللي هيرش مرسي بالمياه هنرشه بالبيبسي!! متطلبش منس أدافع عنك وانت هددت قبلها!! ولو عايزني أصدق إن الداخلية إللي عملت كدة!! أوعدك هصدق بس كمان هصدق إن المعتصمين فرابعة هما اللي موتوا نفسهم!!

وبالنسبة بأه للجانب التاني!! السيسي إللي بتطلبوا انه يبقى الرئيس على أساس إنه هيقضي على الإرهاب بموجب التفويض على حاجة من مهام وظيفته أصلًا!! أهو لمؤاخذة التفويض ده سبب لإدانته !! لأنه تعهد من 6 شهور انه هيقضي على الإرهاب!! وما شاء الله .. الإرهاب مبقاش فسينا بس .. لا ده انتشر لقلب العاصمة!! يعني تعهد بحاجة هو مش قدها !! يعني فشل !! ومن الجانب الأخر أخوه "محمد إبراهيم" إللي فعلا مش عارفه بيهبب إيه لحد النهاردة فمنصبه!! وعلى فكره يا إخوان !! الإثنين "مرسيكم" إللي جايبهم !! المحترم لسه مصرح من يومين !! الأقسام متأمنه وكلاشنكوف وجرينوف ّ!! وإللي عايز يتأكد يقرب ويجرب!! تقريبا يا موكوس انت كنت مأمن أوضة النوم إللي سعادتك مخمود فيها!! حضرتك تقريبا سايب المفتاح مع أنصار بيت المقدس!!! إللي سعادتك لحد النهاردة مش عارف تمسك كلب منهم !! استرجل واعترف بفشلك!! انك مش عارف تحمينا!!

الجميل انكوا انتوا الإتنين شايفني "خاينة وعميلة وقلة مندسة وليبرالية علمانية كافرة وإخوانية متطرفة" مش بس كدة ... أنا كمان لم أنصر الباطل بل بخذل الحق!! تصدقوا أنا فعلا كدة!!

فبصوا بأه !! اتنيلوا اتلهوا على خيبتكم المهببه كلكم!! أنا النهاردة غالبًا عشان أمي مش حمل قهرة قلب !! نمت ومنزلتش شغلي وقت التفجير بتاع شارع التحرير يعني الله أعلم كان ممكن يحصل ايه لو كنت نزلت !! ولما نزلت بعدها وأنا نازلة اتشاهدت !! يعني احنا بنخرج من بيوتنا شايلين كفنا على إيدينا !! يعني مصر مش أم الدنيا ولا هتبقى اد الدنيا !! وبردوا مش بلد الأمن والأمان!! مين المسئول !! كل الكلاب !! مين الضحية المواطن الغلبان ! اللي مات وأهله اتقهروا وعيالوا اتيتموا.. المواطن الغلبان اللي محله اتكسر.. العسكري والظابط الغلبان إللي فخدمتهم سواء جيش ولا شرطة!! واحنا بنرمي المسئولية على بعض!! فعلًا لقد فاق العفن المنتهى!!!

لما نغفل وهو الحقيقة المطلقة

مدركة إن الحقيقة الوحيدة فالدنيا هي #الموت!! بس غظب عني بقيت بخاف من سيرته!! مش خوف إني أموت !! لا بالعكس.. !! حسه إن عندي فوبيا من فقدان أي حد بحبه وقريب مني!! مجرد موت أي حد أعرفه بيسببلي أزمة نفسية!! على مدار الكام سنة اللي فاتوا فقدت ناس كتير!! ومع كل حد فيهم ..كنت بحس حته مني بتتكسر!! كل حد وجعه مختلف عن إللي قبله!! كل حد منهم ليه مكانة فقلبي مختلفة عن التاني!! أوجعهم موت أبويا ثم أعمامي "علي " و" منير." . والقهر والحسرة لما تسمع وفاة حد من صحابك من نفس سنك زي زميل المدرسة محمد صادق وأصدقاء الكلية علياء و أحلام... أحلام اللي كان نفسي أشوفها أوي والشغل والدنيا لخبطت مليون معاد ومعاد.. وغيرهم ناس كتير!! حتى لو مكنتش ترتبطني بهم صله قريبة .. بس على الأقل في موقف أو مكان أو مناسبة أو حتى ذكرى جمعونا سوا!! ده غير سيرة الدم اللي ماليه الشوارع!!

 اللهم لا اعتراض!! فكل مره بقول لازم نعيد حسابتنا !! لازم منتخاصمش!! لازم نبطل تقصير فحق ربنا!! كل مرة قائمة كبيرة من الالتزامات والمحظورات!! وشوية .. وبنسى!! ذاكرة السمك إللي خايفة توديني لطريق مسدود!! بتعافى منها بس مع كل خبر جديد وكأنه قلم نازل على وشي يقولي فوقي!! انتي نسيتي!! ويفكرني بكل التفاصيل!! وساعتها بكتشف أصلًا اني مش ناسية!! أنا متناسية عشان لازم أنسى عشان أعرف أعيش!! هو لو الواحد لازم ينسى حاجة... فهو لازم ينسى إنه ممكن يعيش كتير... لازم ينسى إن الموت للكبار والمرضى بس.. لازم يفتكر إنه مش عارف هو هيقابل ربه الكريم امتى!! ولازم يفكر فأسئلة كتيـــــــــــــــــــــر هتتسئلنا !! عملتوا إيه فحياتكم؟؟؟ لازم يفكر يا ترى كل الناس اللي عرفتهم دول .. هيدعولي ؟؟؟ ولا هينسوني؟؟؟ يارب سخرلي من أهلى وأصحابي وأحبائي من يدعو لي برحمتك بعد مماتي !! دعواتنا لموتانا هي طبطبتنا عليهم فقبورهم .. هي اللي بتأنسهم فوحشتهم !! هي إللي بتنور قبورهم ... لا تنسوا موتاكم من الدعاء.. فكما أسعدوكم فالدنيا .. أسعدوهم في قبورهم .. عسى يسخر الله لنا من يسعدنا يوم نلقاه!! 

اللهم لا اعتراض على قضائك !! فأنت الحق العدل الرحمن الرحيم!! وأنت من بيده مقاليد أمور حياتنا شتى!! أسألك اللهم الرحمة لأحبابي من فارقوا دنياي!! وأسألك الصحة والعافية وطولة العمر لأحبائي ورفقائي في الدنيا!! عسى أنا أسبقهم للدار الأخرة خشية عذاب فراقهم!! فلم أعد أتحمل المزيد من الفراق!! اللهم اجعل الموت راحة لي من كل شر!!

تفائلوا بالخير تجدوه

بقالي فترة بفكر فحال الدنيا ... وليه كل ما بنزل الشارع بحس إن الناس زعلانة ومش مبسوطة... وإن ليه ناس كتير فحياتي يكادوا يكونوا هايلين بس برده مش عارفين يكونوا مبسوطين... عمالة أفكر إيه هي الحاجة اللي نقصانا؟؟ ليه محدش مرتاح ... وللحظات افتكرت تلك الآية من سورة البلد بسم الله الرحمن الرحيم "لَقَدْ خَلَقْنَا الْإِنسَانَ فِي كَبَدٍ" صدق الله العظيم ...

ومن قرآتي لعدة تفاسير توصلت إن معنى الآية الكريمة إن ربنا خلقنا فالدنيا لنكابد الحياه ... بمعنى إننا لازم نمر فحياتنا بصعاب ونخرج منها نمر بغيرها وهكذا وإن الحياة الدنيا مش سهلة وميسرة وجميلة ...

الفكرة هنا ... هو إحنا عايشين حياتنا صح؟؟؟ يعني إحنا بنعمل اللي المفروض اتخلقنا عشانه؟؟؟ هل إحنا فعلًا فاهمين الحكمة من خلقنا في كبد... ؟؟؟ أكيد ربنا سبحانه وتعالى مش بيعذبنا ... أنا عندي قناعة تامة إن ربنا أرحم بعباده من أنفسهم وإن ربنا مخلقش الحرام ... وإنه خلق كل حاجة حلال وإحنا اللي حولناها لحرام بأعمالنا...

هل لو كانت حياتنا ميسرة وجميلة كنا هنقول الحمد لله؟؟؟ هل كنا هنعرف يعني إيه صبر ؟؟؟ هل كنا هنحس بحلاوة الرضا؟؟؟ هل كنا هنبقى درجات ؟؟؟ هل كنا هنتعلم حاجة؟؟

طب بما إن كلنا بنمر بظروف ومشاكل صعبة وبنحس إن الدنيا سودا فوشنا .. وبنفضل نقول ليه يارب .. هو أنا عملت إيه... هو أنا امتى هتبسط .. يارب هو انت غضبان عليا... والكلام الكتير الغريب ده ... ليه منحاولش نعتبر كل أزمة فحياتنا هدية من ربنا لينا ...

أه هدية ... وامتحان كمان ... (أمال هندخل الجنة والنار على أساس إيه)

ربنا بيمتحن صبرنا وإيمانا بيه  عايز يشوفنا راضيين بقضاؤه وقدره ولا لا ... عايز يشوفنا بنحمده على السراء بس ولا هنحمده على السراء والضراء... ربنا بيختبر حسن ظننا بيه واننا عارفين ومتاكدين إن لو اجتمعت الدنيا كلها على نفعنا مش هتنفعنا غير باللي كتبهولنا سبحانه وتعالى .. وان لو اجتمعوا على ضررنا مش هيضرونا غير باللي ربنا كتبه علينا ... واللي أكيد في من وراه حكمة .... 

من الاخر إحنا ناقصنا "الرضا" و "حسن الظن بالله" ... تعالوا نقول الحمد لله ونشكر ربنا على الضراء قبل السراء... نشكر ربنا على كل الناس اللي أذيتنا فحياتنا واللي علمونا وعرفونا إن ربنا بيحبنا عشان كدة أظهرهم لينا على حقيقتهم ... تعالوا نشكر ربنا على صحتنا ... تعالوا نشكره على اننا لسه عايشين وعندنا فرصة للتوبة واننا نكون أحسن...

أنا نويت مزعلش من حاجة ... انا نويت أفرح ... انا عندي حسن ظن بيك يارب وعارفة إنك مش هتردلي حاجة إنت عارف إنها خير ليا  ولو منعتها عني يبقى لحكمة ... أنا نويت أتوكل عليك يارب وأعمل اللي عليا وسايبه الباقي عليك... 

تفائلوا يرحمكم الله ... تفائلوا بالخير تجدوه 

كفانا عشق لوطن العك

عارفين احنا امتى هنبقى دولة.. لما تبطل نضحك على نفسنا بالشعارات الرنانة زي مثلًا "مصر أم الدنيا" .. قولولي سبب واحد يخليها أم الدنيا ... بتعمل إيه لباقي الدنيا ولا حتى بتعمل إيه لولادها... دي لو كانت لقيتنا على باب جامع كانت هتحبنا أكتر من كدة... "وعندك كمان "شعب متدين بطبعه" !!! هو فين ده ؟؟ شعب معندوش إنسانية ولا ضمير ولا دين... مجتمع بيهين المرأه وبينتهك عرضها وبيبرر التحرش بها.. مجتمع بيستغل الأطفال سواء عن طريق حرمانهم من التعليم وقهرهم فالعمل أو حتى تبرير سوء معاملة أطفال

الشوارع... مجتمع منافق، ووصولي، وحقير !!

 قولولي كدة حاجة واحدة عندنا فالبلد من اختراعنا !! قولولي كدة قيمة عندنا مش موجودة عند أي من الدول التانية !! وبلاش ونبي إحنا أحسن شعب وشعب مضياف عشان إحنا أصلا بنكره نفسنا فمش هنحب ولا نضايف أي حد بيجيلنا .. تقدروا تقولوا إن اللي بيحصل ده Show لزوم الفشخرة ما هو ده إللي احنا فالحين فيه ... والفشخرة دي هي اللي مخليانا نطط على العالم بحضارة السبع ألاف سنة إللي احنا حتى منعرفش عنها حاجة ولا حتى حافظنا عليها ولا فكرنا نطورها... !!

أنا مش ناقمة ولا متشائمة ولا أي من الاتهامات إللي هتتهموني بها!! كل الحكاية إني سألت نفسي إحنا ليه كدة؟؟ كنت بحاول أحط إيدي على المشكلة واعترف بها عشان نعمل على حلها !! المشكلة يا سادة مش حكومة ونظام !! المشكلة "شعب" !! المصطلح إللي أنا مستكتراه علينا أصلًا لأن كتير علينا أن ندرج ضمن قائمة الشعوب !!! البلد دي مش هتتصلح غير لما نتغير ونبطل عنجهية وتنطيط على خلق الله !! لازم نعرف حجمنا !! احنا صـــــــــــــــــــــــــــــــــفـــــــــــــــــــــر على الشمال بالنسبة لباقي الشعوب !! ووجودنا من عدمه مش هيضيف للإنسانية حاجة !! كل واحد يفكر فيها ويشوف إزاي هنبقى مؤثرين بشكل إيجابي !! وإزاي هنوصل للشعارات الرنانة دي بدل من ترديدها بالكلام !!! 

وبعد كل إللي فات !! إدوني سبب واحد يخليني أصبر وأعافر وأحارب وأضحي بعمري وحياتي فالبلد دي !! إدوني سبب يخليني أعتز بهويتي المصرية !! أنا مش ملاك !! وأكيد جزء من المنظومة الفسادة !! بس يمكن حسه إن لسه بتمتع بجزء بسيط من الإنسانية والرغبة فالتغيير وعارفة إني لو فضلت هنا هفقد ما تبقى مني !! اتركوا لي ما تبقى مني !! كل ما أتطلع إليه أن يكون لدي #وطن !!!

يا بخت من له أصحاب يدعوله

وإذ فجأة اكتشفت إن ليا أصحاب وعلاقات ومعارف كتير جدًا ... حاولت أصنف أصحابي دول من ناحية "أقرب أصحاب ليا" .. وإللي فعلًا مش متخيلة من غير وجودهم فحياتي الدنيا كانت هتبقى عامله إزاي.. اكتشفت انهم مش قليلين !! أنا فعلًا ليا أكثر من صاحبة يكادوا يكونوا جزء مني !! أعرف إن الطبيعي إن يكون ليك أنتيم واحد وخلاص بس معايا فعلًا الموضوع مش كدة!! وبعد كده فكرت مين صحاب مهمين وبردوا بحبهم وبحس اننا بنأثر فبعض جدًا ...اكتشفت انهم بردوا كتير أوي !! 

أنا شفت إن الموضوع ده عيب وميزة فوقت واحد... أولًا عيب لأن كتر العلاقات دي بيخليك فعلًا بتقصر فحق كتير منهم  وده فعلًا أنا بعمله ويمكن أنا وناس كتير بعدنا بسبب ده.. وميزة لأن مجرد فكرة إنك عارف إن ليك ناس بتحبهم وبيحبوك من قلبهم وبتفرحوا لفرح بعض وتحزنوا لحزن بعض "نعمة" محروم منها كتيييير أوي... 

وللأسف اكتشفت بردوا إن في ناس بتعتبرني حد مهم عندهم وأنا مكنتش واخده بالي من ده أوي.. أو يمكن كنت بتشغل عنهم .. "حقكوا عليا انتوا خساره فيا"  

خلاصة كلامي: فحياة كل منا أصحاب وعلاقات حلوة إوعى تضيع منك.. حافظ عليها على أد ما تقدر... إوعى تخسر حد .. دور على الناس إللي انت غالي عندهم واديهم حقهم .. حب الناس حاجة جميلة أوي  المشاعر المطلقه إللي من غير مصلحة لها لذة حلوة أوي ..هتحس بقيمتها فعلًا وانت فعز فرحك أو فعز حزنك !! وكفاية إنك تسيب سيرة حلوة بعد ما تنتهي رحلتك فالدنيا ويفضل ليك أصحاب كتيير يفتكروك بالخير ويدعولك بالرحمة 

اهزم شيطانك

قررت ألعب مع #الشيطان .. أه والله !!! هو مش الشيطان اتحدى ربنا انه هيغوينا "قال فبعزتك لأغوينهم أجمعين إلا عبادك منهم المخلصين .... " سورة الحجر "82-83".. 

طب أولًا. أنا هكتب الأيه دي عندي فكل حاجة عشان عشان أفكر نفسي إن أي حاجة غلط بعملها أو أي تقصير يبقى إغواء من الشيطان .. طب خلينا نفكر كده هو ممكن يضحك علينا فإيه 1- تأخير الصلاه هعمل خانة فيها الصلوات الخمسة.. 2- مثلًا الكذب ... 3- نميمة...وهكذا كل واحد يشوف أكتر حاجة هو بيضعف فيها وسهل الشيطان يغويه بها..

هنعمل حاجتين .. أولًا هعمل جدول أسبوعي .. في أول عمود:اسمي... والعمود التاني :الشيطان... وبعدين : المعاصي المحتملة ونسيب خانة كده "أخرى" عشان لو عملنا "كارثة جديدة" .. وقدام كل معصية تعملها تحط علامة عند الشيطان .. وكل حاجة تتغلب عليه فيها تعمل علامة عندك ... العلامة دي مثلًا زي "نقط " ..
ثانيًا هنجيب صندوق فاضي أو حصالة ...
هنيجي أخر كل يوم نحسب النقط إللي لينا والنقط إللي علينا ... وعلى كل نقطة لينا هنقول "الحمد لله" ... وعلى كل نقطة علينا "نستغفر ربنا" و "نستعيذ من الشيطان" وتحط فالصندوق ده "جنيه" ... وهتيجي أخر الأسبوع تحسب النقط وتشوف الفلوس كام ... هتاخدهم زي ما هما وتنزل تتصدق بيهم بنية ان ربنا يغفرلك الذنوب دي ... وربنا وعدنا بده فسورة البقرة "إِن تُبْدُواْ الصَّدَقَاتِ فَنِعِمَّا هِيَ وَإِن تُخْفُوهَا وَتُؤْتُوهَا الْفُقَرَاء فَهُوَ خَيْرٌ لُّكُمْ وَيُكَفِّرُ عَنكُم مِّن سَيِّئَاتِكُمْ وَاللّهُ بِمَا تَعْمَلُونَ خَبِيرٌ " ..
وهكذا كل أسبوع ... وكل أسبوع تقارنه باللي قبله ... هتستفاد إيه ...أولًا هتفكر نفسك ان الشيطان موجود ... ودي الخدعة إللي بيعملهلنا انه بيقنعنا انه مش موجود... مع الوقت هتحد من المعاصي .. لأنك داخل تحدي.. ثانيًا: هتحمد ربنا كل ما تعمل حاجة كويسة وساعتها ربنا هيزيدك من فضله جزاء حمدك وشكرك... ثالثًا: هتستعيذ بالشيطان علطول وده هيبعده عنك ".....إلا عبادك المخلصين" ... رابعًا: هتطلع صدقه تاخد عليها ثواب وتكفر بها ذنب 

يعني انت كسبان كسبان ...  أهم حاجة الصراحة والمصداقية مع النفس... ثم النيه وجددوا ثقتكوا فربنا ... استعيذوا بالله من الشيطان ... والأهم "اوعوا تدوا نفسكم أعذار" عشان ده مدخل من مداخل الشيطان...
ربنا رحيم بينا أوي وحنين علينا أوي .. أكثر من أنفسنا ... بنغلط عشان احنا مش معصومين ... بس رزقنا بحلول نكفر بها عن غلطنا عشان يسامحنا ويغفرلنا .. "اللهم انك عفو كريم تحب العفو فاعف عنا"  استغفرك ياربي وأتوب إليك إني كنت من الظالمين... على فكره : كثرة الاستغفار بتزود الرزق 

بلادنا في ظل العبث

المجد لكل من أدرك اللعبة عن بكرة أبيها !! المجد لكل من أدرك أننا "شعب لا يمتلك رفاهية الاختيار".. !! لأن ببساطة خيوط اللعبة ليست بأيدينا !! ما نحن إلا أدوات بيد الحاكم بأمره آيًا كان !! وما حياة الفقراء إلا كلمة يتشدقون بها بخطبهم الرنانة!! عفوًا يا سادة !! لن أسمح أن أكون دمية بيد ولي الأمر تلك المره!! فقد سئمت كوني وسيلة لتحقيق غايتهم!! ليس عيبًا أن نعترف أننا قد وقعنا فالفخ عدة مرات!! ليس عيبًا أن نعترف أننا قد أخطئنا حينما صدقنا آيًا منهم!! ما هو العيب أن نشترك في ذلك العبث بعدما أدركنا إياه!! اتهموني بأية اتهامات تشاءوها فقد اعتدت منكم على هذا!! فأنا الخائنة العميلة!! وأنا الكافرة الملحدة!! وأنا القلة المندسة!! وأنا الإرهابية !! وأنا السلبية وأنا كل هذا!! نعم أنا كافرة بكم وبديمقراطيتكم وحريتكم !! أنا كافرة بشرعيتكم جميعًا !! دعوني وشأني!! لما تشغلون خاطركم بي !! لما تخشوني !! هل أنا على حق !! اعتدت أن الظالم دومًا يخشى صوت الحق!! لأنه الأعلى دائمًا مهما حاولوا كتمانه!! فكفوا عن غبائكم ولا تفضحوا ستركم بأنفسكم!! ووعد مني !! يومًا ما ستذهبون جميعًا إلى الجحيم!! ليس بيدي ولكن بيد من وعده حق!! الله الواحد الجبار المنتقم!! استمروا في طغيانكم !! أما أنا..!! سأستمتع رؤيتكم وأنتم تحرقون أنفسكم بأيديكم .. سيعيش وطني رغمًا عن أنفكم وستهلكون جميعًا يومًا ما!!

علموا بناتكم

صدقوني عمرنا ما هنطلع خطوة واحدة لقدام.. طول ما في ناس بتتعامل مع البني أدم على أساس نوعه "ذكر أم أنثى" .. وفككوا من جو البنت واخده حقها والكلام ده.. لأننا فعليًا عايشين فمجتمع "ذكوري ومتعفن كمان"...في أهالي على فكره بيطلبوا من بناتهم إنهم ميطوروش نفسهم على المستوى "العلمي والمهني" عشان بس "يا بنتي فرصك فالجواز هتقل".. أه والله بيحصل !! بس هما كدة مش شايفين انهم بيعملوا حاجتين : أولًا هما أثبتوا إن ما شاء الله البنات المجتهدة والناجحة والطموحة أكثر بكتيييير من ولاد كتيييير ... ثانيًا: هما بيطلبوا من بناتهم يقللوا نفسهم عشان ترضى بفكر حد ممكن أوي تكون هي شايفاه تافه بالنسبه لها -ده إن مكنتش شايفة نفسها أرجل منه- !!

لما نوصل إن مجتمعنا بأه عنده "فوبيا" من كل بنت عندها شخصية وناجحة وطموحه وشايفها إنها "عورة" و "كارثة" لازم تتدراى .. وحصر دورها على إنها لازم تبقى زوجة وأم وبس وأي حاجة تاني مش مهم.. وإن لو حققت نجاحات كبيرة على الصعيدين "العلمي والمهني" بتتصعبنوا عيها وشايفنها "غريبة" وبتدفن شبابها -مع إن بردوا في كتيييير أوي عارفين يوازنوا صح بين الكفتين-... يبقى إحنا فعليًا مجتمع "مريض نفسيًا" بكل المقاييس !! 

الأنثى إللي مش عاجباك دي !! هي الأم إللي بتربي وهيكون عندها فيوم من الأيام شحط زي حضرتك مش عايزاه يطلع تافه ويقف على النواصي ويلعب ببنات الناس!! الأنثى دي هي إللي قدرت وهتقدر تثور وتتخلص من قيود وعاهات وتقاليع مجتمعية ملهاش أي ثلاثين لازمة غير إنها تحط البنت فخانة " ميصحش إنتي بنت" و "البنت ملهاش غير بيت جوزها" "دي عندها 30 ولسه متجوزتش" و "يا خبر دي اطلقت أكيد فيها حاجة غلط"... بنت يعني " إذن كل حاجة غلط وممنوعة وعيب" ... والولد يجوزله أي حاجة "ده راااااااجل محدش هيلومه".... نفسي أعرف مين -محدش- إللي معاه مفاتيح الجنة والنار ده!!

ارتقوا بالله عليكم ... كفاياكم تصنيف .. مفيش حاجة اسمها "بنت ولا ولد" ... "أبيض ولا اسمر" .. "مسلم ولا مسيحي"... في حاجة اسمها "إنســـــــــــــــــــــــــــــــــان" ... هو ده إللي ربنا هيحاسبه ... لأن ربنا مفرقش بينا فالحلال والحرام والصح والغلط على أساس جنسنا.. فمش هتيجي انت يا بني أدم تقولي ان البنت "ناقصة" .. عشان لما تفسرها كدة هتبقى انت إللي ناقص وجاهل ورجعي كمان.. عشان الناقصة دي هي إللي أثبتت إنها تقدر تعمل أي حاجة انت بتعملها ... فحين إن انت في حاجات كتير أوي هي بتعملها انت متقدرش على ربعها ... على فكرة ربنا منحها كمان حاجة مش عندك وهي "العاطفة" .. يعني هي إنسانة تقدر تحكم الأمور بـ "عقلها" و "قلبها" فآن واحد .. وغالبًا بتكون هي دي صاحبة القرارات الصائبة ... 

رسالة مني لكل البنات .. إوعي تسمحي لحد يهز ثقتك فنفسك أو يكسرك لمجرد إنك "أنثى"... إوعي تكرهي "أنوثتك" وتتنكري فزي "الذكور" لمجرد إنك عايزة تتساوي بهم...افخري بأنوثتك وجمالك واهتمي بهم وغذي عقلك بالعلم والعمل... وغزي روحك بالفن ... حبي نفسك عشان انتي تستاهلي وقيمتك غالية أوي ومن غيرك الكون ملوش وجود... متفرحيش لما حد يقولك انتي "بنت بـ 100 راجل" .. وقولي "أنا بنت بـ 100 إنسان"... ودي صفة عندي أغلى وأهم وأقيم كتير من وصفي بـ "راجل" طبيعي تكون راجل أو ست لكن مش كل راجل أو ست ينفع نقول عليه "إنسان" ... علموا بناتكم #الإنسانية #الحب #الرحمة #الطموح #الهدف#الاستقلالية .. ابعدوهم عن #التبعية #التهميش #الخضوع#الاستسلام